Hnarthi

HNARTHI

By Lalsiampara Thangate on Friday, December 7, 2012 at 9:44pm

Hnarthi (Nosebleed/Epistaxis)

Hnarah hian thisen zam tam tak a inzam tuak a, a awmna hi hmai langsar lai, engemaw hleka chut palh awlna hmun a lo ni bawk nen, tih thi mai hi thil awl tak a ni. Hnar thi tam zawk hi chu ho te, harsa lo taka reh leh mai thei a nih laiin a then chu a nasa thei hle thung. Hnar thi hi thlasik lai leh khawro hun laiin a tam duh bik.

Hnarthi chhan :

Tam tak a awm thei, hengte hi a langsar zualte an ni :

• Infection
• Inhliam leh hnapkhir kheuh
• Hritlang (Allergic & non-allergic Rhinitis)
• Thisen sang (High blood pressure)
• Damdawi thenkhat hmanin (anticoagulant, aspirin etc)
• Zu ngawl vei (alcohol abuse)
• Cancer leh hnara chawr/bawk awm
• Pianken thisen dik lo (inherited bleeding problem)
• Naupai lain

Hnarthi chu engtinnge kan tihreh ang?

Hnarthi tam zawk hi chu doctor pan kher ngai lovin mahnia tihreh theih a ni, hetiangin:-

• Hnar nem(soft part of nose) chin zawng huamin kutzungpui leh zungchalin hmehpin tlat tur, i kut khan hnar kha hmai ruhah nem bet tlat bawk ang che.
• He tih lai hian kun deuh titihin awm tur a ni a, hrawk lama thisen kal a awm chuan lem lovin chhakchhuah zel tur.
• Minit nga i nem hnuah thlah la, a la thi cheu a nih chuan a ngai angin ti nawn leh rawh.
• Vur towel-a fun, hnar leh biang vel deh nana hman a tha bawk.
• Hnarthi a reh hnuah muzal lovin, thu-mu chungin chawlh hahdam rih tur.

Hnarthi nawn sek loh nan engtia inven tur nge?

• Hnaphnit fimkhur tur
• Hnar kheuh/hawlh loh tur
• Daikal leh zunin san vak loh tur
• Hahchhiau laiin ka an tur
• Kunin thilrit la suh
• I lu kha i lung aia sangah awmtir hram hram ang che
• Mei zuk loh tur
• Chaw nem leh dai ei la, thil sa lam chu hnar thi hnu darker 24 chhung chu engmah in loh tur.
• Thisen khangna tibuai thei damdawi (aspirin, ibuprofen, warfarin etc) ei miah loh tur.
• Hnarkaw chhung ro lutuk tur ven nan lubricating ointment (Neosporin oint. etc) hnawih thin a tha.

Eng hunah nge Doctor pan tur?

• A chunga tih tur tih anga in tih hnu pawha a reh mai theih lohin
• Hnarthi chu a chak viau a, thisen a chhuah hnem viau bawk chuan
• Damlo chu a chauh viau a, tlusawp mai tur anga a awmin
• Hnarthi bakah hmai leh lu-ah hliam dang a awm a, mitvai leh nikhaw hre lo-a an awmin.
• Hnarthi bakah khawsik leh lu na a awm telin.